Saturday, May 15, 2010

வெற்றி தோல்வி..

என் தூக்கத்தை

கனவுகள் கைப்பற்றுகின்றன..
கனவுகளில் 
விருப்பும். வெறுப்புமுள்ள
அறிமுகமற்ற, அறிமுகமுள்ள
சில பேர்
தன் விருப்பம் போல் உலவுகின்றனர்..

அவர்களை விரட்டும் முயற்சியில்
வெற்றி தோல்வி காணுமுன்
அதிகாலை வந்து விடுகிறது..

சில நாட்களுக்குப் பின் 
முடிவொன்றைக் கைக்கொண்டேன்
‘பழிக்குப்பழி வாங்க‘ 
என் கனவுகளில் துரத்தியவர்களின் 
கனவுகளில் நுழைந்து
தாக்கலாமெனத் திட்டமிட்டேன்

சொல்லிவைத்தாற்போல்
அத்தனைபேர் கனவிலும்
அவரவர் உருவங்களே
உலவிக் கொண்டிருந்தது..

உடனடியாகத் திரும்பி
என் கனவில் புகுந்து 
உற்றுக் கவனித்தேன்
என் நிழலையொத்த
உருவங்கள் நிழலாடின..

No comments: