சிதிலமடைந்த ஞாபகங்கள்

இன்னும் விசாரிக்கப்படாமல்

நிலுவையில் நிற்கக்கூடிய

கேள்விகள் சிலவற்றிற்கு

பதிலேதும் இல்லை..

ஆவணப்படுத்தப்பட்ட

உனது ஆணவங்களை

தூக்கி எறியவோ

நெருப்பில் எரிக்கவோ கூடவில்லை

உறுதிமொழியற்ற

பேச்சுவார்த்தைகளுக்கு

உடன்போக்கு சென்ற

உயிருக்கு தற்போது நினைவு இல்லை..

ஓய்ந்து போன முயற்சிகளுக்கு

உரமூட்ட உனது சாயலில்

ஆனால் உன்னைப் போலல்லாத

நிழல் ஒன்று நிஜமானது

பழையவை துறந்து

புதியவை பிறந்த நாளொன்றில்

முன் சுவடுகளை அழிக்கும்

நோக்கம் தலை எடுக்குமுன்

மன்னிக்கவோ மறக்கவோ

தயாராக இருந்தது 

சிதிலமடைந்த என் ஞாபகங்கள்..