வெற்றிடத்தின் கடைசிப் புள்ளி

அந்த கணம் அப்படியே

நெஞ்சில் ஆழ உறைந்துவிட்டது

கேள்விகளும்

எதிர்கேள்விகளுமாய்

கடந்து போன நிமிடத்தின்

பதற்றங்கள் இன்னும் தணியவில்லை

சிரித்துப் பேசியபடியோ

கொஞ்சிப் பேசியபடியோ

நெருங்கும்போது

முந்தைய கோபக்கங்குகளின்

அனலை உணர்கிறேன்

இருவருக்குமிடையில்

விழத் துவங்கியிருக்கும்

வெற்றிடத்தை

எதைக் கொண்டு நிரப்புவதென

சிந்திக்கிறேன்..

உனது கேள்விகளை

உனது கோபங்களை

எந்தவித கவசமுமின்றி

எதிர்கொள்வதென

இப்போதைக்கு

உத்தேசித்துள்ளேன்..

வெற்றிடத்தின்

கடைசிப் புள்ளி மறையும்போது

நாம் மேற்கொண்டு பேசலாம்

ஒரு நண்பனைப் போல் நீயும்

ஒரு தோழியைப் போல் நானும்