காதலற்ற உன் இதயத்தில்

மகிழ்வுறுமென் கனவுகளையும்

துயருறுமென் இரவுகளையும்

உனக்கு சொல்வதற்கு பிரியமில்லை..

எனது பெருந்துயரும்

சிறு மகிழ்வும்

என்ன தந்துவிடக் கூடும்

காதலற்ற உன் இதயத்தில்..

உதிரும் கண்ணி

எனது எதிர்பார்ப்பின் 

எல்லைகளைத் தகர்த்தெறியும் 

உனது அலட்சியத்திலென்

நினைவிலிருந்து

ஒவ்வொரு கண்ணியாய்

உதிர துவங்குகிறாய்..

நீளும் பொழுதுகளில் சேமிக்கிறேன்

உதிரும் கண்ணிகளை

மீண்டும் நினைவில் கோர்ப்பதற்கு..

குறுஞ்செய்தி

எதிர்காலம் பற்றிய

எந்தவொரு அச்சமுமற்று

நிகழ்காலத்தில் வாழ்ந்துவிட

ஏங்குமென் மனதின் 

அத்துணை துயரங்களையும்

துடைத்தெறிந்து விடுகிறது

கடந்தகாலத்தில் நீயனுப்பிய 

குறுஞ்செய்திகள்...

நடைபாதை

பெரும் இரைச்சலுடன்

கடந்து போகும் வாகனப் பொதிகளுக்கு

மத்தியில்

கண்ணீருடன் பயணப்படுமென் 

விழிகளை யாரும் 

கண்டு கொள்ள இயலாதுதான்.. 

சொட்டு சொட்டாய் வீழும் கண்ணீரைத் 

தொட்டுத் தொட்டு உலர வைக்கும்

காற்றுக்கு மட்டும் 

என் கண்ணீருக்கான இரகசியம் தெரியும்.. 

யாரிடமும் சொல்லத் தெரியாத 

காரணத்தால் 

காற்றை மட்டும் அனுமதித்திருக்கிறேன்..

என் கண்களுக்கும், கனவுகளுக்குமான

நடைபாதைகளில்..

மாறாதிருக்கட்டும் எதுவும்

ஒரு காலகட்டத்தில் 

நமக்கிடையேயான 

பிரமிப்பு 

நீங்கிப் போகலாம்..

அப்போது நாம் 

பிரியமாயிருப்பதே

பிரமிப்பாயிருக்கலாம்..

ஒரு நேரத்தில் 

நமக்கிடையேயான

ரசனைகள் மாறிப் போகலாம்

அந்நாளில் நமது 

ஒத்த சிந்தனைகளே

ரசனையாகலாம்..

ஒரு பொழுதில்

நமக்கிடையேயான

அத்தனையும் கசந்து போகலாம்..

ஆனபோதும்

முந்தைய தினசரி பதிவுகளே

சர்க்கரையாகலாம்..

எல்லாம் மாறிப் போகட்டும் விலகலில்.. 

மாறாதிருக்கட்டும் எதுவும் நெருக்கத்தில்..

எழுத்துரு

எழுத்துரு 
பிரச்சினை இன்றி 

வளைந்து கிடக்கும் கொம்புகளையும் 

மாறிப்போயிருக்கும் கால்களையும் 

சரியாகப் பொருத்தி 

புரிந்து படித்து விடுகிறாய்.. 

புரிந்து கொள்ள 

முயற்சிக்கவே  இல்லை

கவிதையிலிருக்கும் 

என் வார்த்தைகளையும் ..

மாறாதிருக்கும் என் நேசத்தையும்.. 

கடற்கரையில் உலவும் காதல்

மாதா கோவிலில் இருக்கும்
உன்னை நினைத்தபடி
வெள்ளிக்கிழமை பூஜையில் நான்

பூஜையில் இருக்கும்
என்னை நினைத்தபடி
மாதா கோவிலில் நீ

இரு தெய்வங்களும்
நம்மைப் பற்றி பேசியபடி
உலவுகின்றன
கடற்கரை மணல் வெளியில்

தனிமையின் நிழலில்

தற்கொலை செய்து கொள்ள
அதீத தைரியம்
தேவைப்படுகிறது..

ஒரு நொடி மாற்றத்தைக்
கைப்பற்றிக் கொள்ளும்
அவசரம் தற்கொலைக்கு
முக்கியமானது..

அந்த நிமிடத்தைக்
கடந்து விட்டால்
அது செயலிழந்து போகவும் கூடும்..

தற்கொலைக்கு
ஒற்றை சிறிய காரணம் கூட
போதுமானதாயிருக்கிறது..

தான்தோன்றியாய் அலையும்
தற்கொலைக்கு
தனிமைவாதிகளை மிகவும்
பிடித்துப் போகிறது..

அங்கங்கே
இளைப்பாறும்
தற்கொலை
பதுங்கியிருக்கிறது
தனிமையின் நிழலில்..

தானியங்கிபடி

நமக்கிடையே ஏற்பட்ட 

ஊடலில்

முதல் தளத்திலேயே 

சில பொருட்களை 

வாங்கிவிட்டு திரும்புகிறோம்.

அருகில் 

தானியங்கிபடி

நகர்ந்து கொண்டேயிருந்தது

முன்னொருமுறை

தானியங்கிபடியில் பயணிக்கையில் 

பயத்தில் உன் கைகோர்த்துக் கொண்டது

நொடிநேரமேயாயினும்

நெஞ்சுக்குள் நிறைந்து கிடந்தது

அந்த நினைவுகளை 

செரித்தபடி 

இருவரும் நகர

ஊடல் வடிந்து கொண்டிருந்தது

வீட்டிற்கு திரும்பும் வழியெங்கும்... 

நீயின்றி

நீ தாமதமாய்
திரும்பும் போதெல்லாம்
நான் தூங்கி விட்டேனா
என்றே கவனிக்கிறாய்
உனக்கு புரிவதில்லை
என் இமையே
நீயின்றி
விழியுறங்குவது எப்படியென?

எதிர் வீட்டுக் குழந்தை

எதிர் வீட்டுக் குழந்தை
என்னிடமிருந்து
தினமும்
ஒரு கையசைப்பையும்
ஒரு முத்தத்தையும்
பெற்று விடுகிறது
எந்த ஒரு தயக்கமும்
தடையும் இன்றி
நானும்
எதிர் வீட்டுக் குழந்தையாய்
பிறந்திருக்கலாம்
உனக்கு..

சில விருப்பங்கள்

என் காலுக்கான செருப்பு 
அழகானதா? 
பொருத்தமானதா? 
என்பதை விடவும் 
எனக்கு பிடித்தமனதா? 
என அறியும் உனக்கு 
தெரியாமலா போய் விடும்? 
எனது இன்னும் 
சில விருப்பங்கள் 

நறுமணம்

பரிசோதனை செய்யப்பட 
பல வாசனை திரவியங்களின் 
கலவைகளும் 
இருவரின் கைகளிலும் 
நறுமணம் வீசுகிறது.. 
நேரம் கடந்த பின்னும் 
இனி அதில் மிச்சமிருக்கப் போவது 
உனக்கு என் வாசமும் 
எனக்கு உன் வாசமும்.. 

மீட்டெடு

உன் தொடர்பிலிருந்து
துண்டிக்கப்படும் போது
என் பூமியின்
ஈர்ப்புவிசை
ஒழுங்கற்றதாகிறது..

என் கடலின் அலைகள்
கரைகளால்
விழுங்கப்படுகிறது..

என் அமைதியை
சிதறடிக்கிறது
மீட்டெடு
யாவற்றிலுமிருந்து
காத்திருக்கிறேன்
யுகம் யுகமாய்
உன் வருகைக்காக..

காற்றில் கலவாமலே

விலகிச் செல்வதின்
கணம் தாங்காமல்
அலையுறும் மனதின்
ஆற்றாமையைக்
கண்ணுறாமல் நகர்கிறாய்

மீண்டும் வெளியேற
எத்தனிக்கும் சொற்கள்
காற்றில் கலவாமலே
கரைந்து விடுகிறதென்
வெப்பத் தாக்குதலில்

சில சமயங்களில்
குழந்தையென புரண்டழுவதும்
சில சமயங்களில்
கட்டளையிடும் தொனியிலும்
வெளிப்படுமென் சொற்களில்
ஆங்காங்கே தூவியிருக்கிறேன்
உன் மீதான நேசத்தை..

நீயேயறியாத தருணத்தில்
உனக்குள் விழுந்து கிடக்குமது
உன் பார்வையின்
வழி கசிகிறது
நான் எதிர்படுகையில்..

அலையும் சுவாசம்

என் சுவாசம் வெளியேறுகிறது
உன்னைத் தேடி
நீ உள்ளே ஒளிந்து கொள்கிறாய்
சுவாசம் உள்ளே நுழைகிறது
நீ வெளியே ஓடி மறைகிறாய்
வெளியேறியும்
உள்ளிறங்கியும்
அலையும் சுவாசம்
உன்னைக் காண இயலாமல்
திரும்புகிறது
தன் கூட்டிற்கு
வெற்றுடம்புடன்...

இரவுகளைத் தவிர.

காதலர் தினத்தில்
உனக்கு பரிசளிக்க
என்னிடம் யாதுமில்லை
என் இரவுகளைத் தவிர..

துணை

கடற்கரையிலிருந்து
கடைசியாக வெளியேறிய நம்மை
வழிமறித்த அலை கெஞ்சியது..
அடுத்த அலை வரும் வரை
துணையிருக்கச் சொல்லி..
அலைக்குத் துணையாக
பேசியபடியிருந்தபோதில்
நமக்கு துணையாக
வந்தமர்ந்தது
காதல்...

வரம்

உன் மடியில் 

மரணிக்கும் 

வரம் தருவாய்

உன் விழிகளில் 

வாழ்கிற 

வரமின்றி போனாலும்..

பலம்

என் பலமெல்லாம்
நீயாயிருக்க
எனக்கு அவசியமில்லை
பிற பலமும்
பிரபலமும்