துண்டுசீட்டு

சாலையோரங்களில் 

விநியோகிக்கப்படும் 

துண்டுசீட்டுகளை 

வாங்கி பறக்கவிடும் 

பாதசாரியைப் போல நீ.. 

துண்டுசீட்டாய் என் காதல் ..

காதல்

ஏமாற்றியது 

நீயோ நானோ 

அல்ல. 

ஏமாந்து போனதென்னவோ 

காதல் தான்.

உன் பிம்பம்.

நீ காயப்படுத்திய 

இதயத்தை 

நீயே சுமந்து சென்று விடு.. 

அதிலிருந்து வழியும் 

இரத்தக் கறைகளில் 

நிழலாடுகிறது..

உன் பிம்பம்.. 

கண் சிமிட்டு

சண்டையில் 

தொண்டை வெடிக்க 

சுத்தும் காதல் 

சமாதானத்தில் 

கண் சிமிட்டுகையில் 

எழும் ஒலியையும் 

விஞ்சுகிறது.. 

நானும் நீயும்

எனக்குப் பிடிக்காதென்று 

பலமுறை சொல்லியும்

அதைத் தான் செய்கிறதுன் நட்பு..

உனக்கு 

பிடிக்காதென 

நீ சொல்லாமலிருந்தும்

அதைச் செய்வதில்லையென் காதல்..

உனக்குப் பிடித்தவற்றை நானும் 

எனக்குப் பிடிக்காதவற்றை நீயும்

செய்து வருகிறோம்.

இரண்டிலுமிருக்கும் 

பிடிப்பே 

நமக்கான பிணைப்பாகிறது..

உன் காதலுடன்

பெரும் விபத்தில் 

மரணத்தின் வாயில் தொட்டு 

மீண்டதிலிருந்து 

வாழ்ந்து விட துடிக்கிறேன்..

மொத்தமாய் 

உன் காதலுடன்.

இடைவெளி

காதல் வந்தமர்ந்து

விளையாட வேண்டுமென்றே

விட்டு வைக்கிறோம்

உனக்கும் எனக்குமான 

இடைவெளியை

சிறு அடி

இருசக்கர வாகனத்தில் 

உன்னை ஏற்றிக் கொண்டு 

செல்லும் போது

ஏதோ பேசுகையில் 

மகிழ்வின் வெளிப்பாடாய்

உனக்கு சிறுஅடி கொடுத்துவிட்டு

வருத்தப்பட்டேன் 

வீடு திரும்பிய பின்னும்..

அந்த சிறு அடி உனக்கும் 

பிடித்திருந்தது என்றபோதுதான் 

எனக்குள் 

எடுத்து வைத்தாய்

முதல் அடியை..

காதலின் குரல்

என்ன செய்கிறேன் 

என்ன பேசுகிறேன்

எதுவும் தெரியவில்லை..

என்ன நடக்கிறது 

என்ன கிடக்கிறது 

எதுவும் புரியவில்லை.. 

நான் இருக்கிறேனா? 

நான் இறக்கிறேனா? 

யாரும் அறியவில்லை..

என்னைச் சுற்றி 

அழும் குரல்களில் 

காதலின் குரல் மட்டும் 

அடையாளம் தெரிகிறது.. 

நொடிநேர சுதாரிப்பு

கால்பந்தில் கோல் எடுப்பது..
மட்டைப்பந்தில் விக்கெட் எடுப்பது 
இறகுப்பந்தில் புள்ளிஎடுப்பது
சதுரங்கத்தில் வெட்டி வீழ்த்துவது 
எல்லாவற்றிலும் வெற்றி தோல்வியை 
ஒருவரின் 
கண நேர பின்வாங்குதல்
அல்லது 
நொடிநேர சுதாரிப்பு 
ஏதோ ஒன்று 
தீர்மானிக்கிறது.. 
காதல் விளையாட்டில் 
மட்டும்தான் 
ஒருவரின் வெற்றி 
இன்னொருவரின் வெற்றியாகவும் 
ஒருவரின் தோல்வி 
இன்னொருவரின் தோல்வியாகவும்
மாறுகிறது.

உதைத்தாடு

இரு குழுவாக பிரிந்து 
ஒற்றைப் பந்தை 
உதைத்தாடுவதைப் போலிருக்கிறது 
ஒற்றை நேசத்தை இருவரும் 
நட்பென்றும் 
காதலென்றும் 
பந்தாடுவது

நட்புடன் உன் காதலி

உனக்கு எழுதப்படும்
கடிதம்
மகிழ்ச்சியளிக்கிறது
நட்புடன் உன் காதலி
அல்லது
காதலுடன் உன் தோழி
என கையெழுத்துடுகையில்

நான்கெழுத்து

உன் பேர் கொண்ட 
அமைச்சரிலிருந்து 
ஐந்து வயது பையன் வரை 
அனைவரையும் பிடித்துப் போகிறது 
என் நாணத்தையும் 
மகிழ்ச்சியையும் 
பூக்கச் செய்கிறது ..
உன் பெயரின் 
நான்கெழுத்துக்கள்..

காதல் வாழ

என் காதல் செத்து 
நான் வாழ்வதை விட 
நான் செத்து 
என் காதல் வாழட்டும்

நான் யார் காதலுக்கு..

பெருந்துயர்களையும் 

பேரிடர்களையும் 

சந்தித்துவிட்ட என் 

பயணத்தில் 

உயிருக்குள் 

கிள்ளிப் போட்ட 

நெருப்பாய் சுடுகிறது..

காதலை ஏந்தி செல்வது 

ஏந்தி செல்லவோ 

இறக்கி விடவோ 

நான் யார் காதலுக்கு.. 

நிராயுதபாணி

காதலே 

உன்னைக் கொன்று புதைக்க

ஆயுதமேந்தினேன்.. 

நீ 

எனக்கெதிராய் 

ஆயுதமேந்தினாய்..

நிராயுதபாணியாய்..

கையளவு

காதலுக்குள் 

இறங்கியவர்களை விட 

காதலை 

தள்ளி நின்று 

பார்க்கிறவர்கள் 

அள்ளிச் செல்கின்றனர் 

கையளவு காதலையாவது.. 

உன் வாழ்க்கை

வாழ்க்கையையே 

பணயம் வைத்தேன் 

உன் காதலுக்காக 

என் காதலையே 

பணயம் வைத்தாய்
உன் வாழ்க்கைக்காக.. 

வெற்றியல்ல

இவ்வளவு நாட்கள் 

இழந்ததெல்லாம் இழப்பல்ல 

உன்னை 

நான் சேர்ந்துவிட்டால்.. 

இனிமேல் 

பெறுபவை எதுவும் 

வெற்றியல்ல 

உன்னை 

நான் இழந்துவிட்டால்...

ஒன்றைத் தேர்ந்தெடு

ஒவ்வொருமுறையும் 
வார்த்தை முத்துக்களை உதிர்த்து 
காதலா? நட்பா? என சொல்ல 
இதயம் பல்லாங்குழியில்லை.. 
மூடிய கையை நீட்டி 
ஒன்றைத் தேர்ந்தெடுக்க 
இது ஒத்தையா? ரெட்டையா? இல்லை.. 
சிறு தக்கையினை 
மணலில் மூடி வைத்து 
சரியான இடத்தைக் கண்டுபிடிக்கச் சொல்ல 
இது கிச்சுக் கிச்சு தாம்பாளமில்லை. 
மொத்தத்திலென் முடிவை மாத்திக் கொள்ளும் 
உத்தேசம் ஏதுமில்லை.. 
என் நேசமொன்றும் 
விளையாட்டுப் பொருளில்லை.