ஒரு தொடக்கமும், ஒரு முடிவும்..

எப்போது வேண்டுமானாலும் 

நிகழ்ந்துவிடக்கூடிய 

தொடக்கமொன்றும் 

முடிவொன்றும் 

இருவருக்குமிடையில் 

மௌனித்திருக்கிறது.. 

உன் பிடிவாதத்தைத் 

தூக்கிஎறிந்து ஒரு தொடக்கத்தையோ 

என் பிடிவாதத்தை 

தொடர்ந்து ஒரு முடிவையோ 

எட்டிவிடக் கூடிய காலம் 

வெகுதொலைவில் இல்லை..

எப்போது வேண்டுமானாலும் 

நிகழ்ந்துவிடும் 

ஒரு தொடக்கமும், ஒரு முடிவும்.. 

வெடித்தெழு

வேதனைகளை 
வேடிக்கை பார்க்கும் 
மௌனமே 
வெடித்தெழு 
சாவதற்குள் 
ஒருமுறையேனும்.... 
வரலாறு கூறும் பழிச்சொற்களில் 
ஒன்றிரண்டு குறையக்கூடும் 
உன் சந்ததிக்கு.

மௌனம்.

தகித்தலையுமென்

நேசத்தின் மீது

நிச்சயமின்மை பற்றிய

பயத்தை 

நிகழ்த்திக் கொண்டிருக்கிறது

உன் பெரு மௌனம்..

நீயுரைத்த சொற்கள்..

நெடுந்தொலைவுக்கு 

துரத்தியடிக்கிறது..

உனது மௌனத்தை 

உடைத்து 

நீயுரைத்த சொற்கள்..

உனது பொய்மைகளின் 

பின்னே இருக்கும் 

உண்மைகளின்

பிம்பத்தை அறிந்திருக்கிறேன்..

ஏதோ ஒன்றிற்காக

ஏதோ ஒன்றைச் சொல்லி

நழுவுகிறாய்..

யாதொரு வழியும் 

புலப்படாமல் 

உனது நிழலைச் சுற்றியே

பின்னிக் கிடக்கிறேன்..