புன்னகை

கதறியழும் என்னை 

அடித்தாவது 

அழுகை நிறுத்த 

முயற்சிக்கிறாய் 

நீ அடிக்க அடிக்க 

அழுகிறேன்..

நான் அழ அழ 

நீ அடிக்கிறாய்.. 

கண்ணீரை துடைத்துவிடேன்,,

புன்னகைக்கிறேன்.

உன் விழிப்பிற்குப் பின்.

துக்கம் மேலிட 
அழும் மனதின் ஓசை 
உன் தூக்கத்தைக் 
கலைக்கக் 
கூடுமென 
ஒத்தி வைக்கிறேன் 
என் துக்கத்தை 
உன் விழிப்பிற்குப் பின்.

மரணம்

என் கண்ணீர்த் துளிகளைத் 

துடைக்க உயிர்த்தெழுவாய் எனில்    

ஒருபோதும் 

உன்னை மரணம் 

அழைத்து செல்ல முடியாது.

அழுது விடாதே.

என் மரணத்தில்
கூட அழுது விடாதே.
உயிர்த்தெழுந்து
விடப் போகிறேன்..
உன் கண்ணீர்
துளிகளைத் துடைக்க..

கைத்தொட்டிலிலிடு

உரம் விழுந்தழும் 

குழந்தையென காதல் 

உன் மன முறத்திலிட்டு 

புடைத்து 

கைத்தொட்டிலிலிடு

அழுகை நிறுத்தி 

அமைதி நிலவ..

இனிமையானவன்.

இதயத்தில் 

யாரோ ஓங்கி

அறைவது போலான வலி

அழுது தீர்க்கிறேன்

உருண்டு புரளுகிறேன்..

இரத்தம் சொட்ட சொட்ட 

சிறிது நேரத்தில் 

வலி குறைந்து தூங்கிப் போகிறேன்..

காலையில் என்னைச் சுற்றி 

மொய்த்துக் கிடந்தன எறும்புகள்..

என் கண்ணீருக்கு காரணமானவன் 

இனிமையானவன்.

கண்ணீரும் புன்னகையும்

எவ்வளவோ விலகியிருந்து

நேசித்தும்

எவ்வளவோ அருகிருந்து

சண்டையிட்டும் 

ஆகிவிட்டது

இனி ஏது நிகழ்ந்தென்ன? 

கண்ணீரும் புன்னகையும் 

கைகோர்த்தே பயணிக்கையில்.. 

கண்ணீர்த்துளிகள்

அவசியமற்றதாக இருக்கிறது

நேற்று நள்ளிரவிலிருந்து

இன்று அதிகாலை வரை 

தூறும் மழை..

எனது பேச்சினைப் போல்..

வாசனையோடு

வெப்பத்தையும் 

வெளிக்கிளப்பிய மழைக்கு

எப்படி தெரியப் போகிறது?

மழையோடு போட்டி போடுமென் 

கண்ணீர்த்துளிகள்.. 

கண்ணீரின் சுவடு

*தாமதமாய் வீடு
திரும்புவாயென
தெரிந்தும்
காத்திருந்து காத்திருந்து
சில துளி கண்ணீருடன்
தூங்கிப் போகிறேன்..
விடிகாலையில் பார்க்கிறேன்
உனது உதடுகளில்
கண்ணீரின் சுவடு...