ப்ரியமானவனே

எப்போதும் உன் மீது 

ப்ரியங்களைப் 

பொழியக் காத்திருக்குமென் 

மேகத்தை

கலைப்பதற்காக வீசுகிறாய்..

உன் வார்த்தைகளைக் காற்றாய்..

கேள் ப்ரியமானவனே

காற்று கலைக்கும்

வேலையை மட்டும் செய்வதில்லை

பொழியத் தூண்டுவதும் அதுவே.

அலைபேசி

இறந்து கிடக்கிறது 

என் அலைபேசி 

உன் அழைப்புக்களின்றி..

உயிர்ப்பி

ஒரு துண்டித்த அழைப்பிலாவது 

புன்னகை

கதறியழும் என்னை 

அடித்தாவது 

அழுகை நிறுத்த 

முயற்சிக்கிறாய் 

நீ அடிக்க அடிக்க 

அழுகிறேன்..

நான் அழ அழ 

நீ அடிக்கிறாய்.. 

கண்ணீரை துடைத்துவிடேன்,,

புன்னகைக்கிறேன்.

பழி

நசுக்கப்பட்ட 

உணர்வுகள் 

வெடித்து சிதறுகையில் 

பழி வாங்கி விடத்தான் 

தோன்றுகிறது 

சில விஷயங்களில்.. 

பொறுக்கமாட்டாமல்.

உன் நினைவு

உன்னைப்போல் 

அவ்வளவு எளிதாக..

தற்காத்து

தடுக்க முடிவதில்லை.. 

உருண்டோடிக் கொண்டிருக்கும்

உன் நினைவுகளை.. 

நீ தரும் வலி

மிக பாதுக்காப்பாய் 

வைத்திருக்கிறேன்

நீ தரும் வலிகளை ..

எந்த வித மருந்தும் தடவாமல்.. 

வலிகள் பழகிய 

எனக்கு மட்டுமே 

கையாளத் தெரியும்.. 

யாராலும் தாங்கி கொள்ள 

முடியாத அவற்றின் 

கதறலை.. 

உன் கண்கள்

பரிச்சயமான வீட்டின் 

அனைத்து 

அறைகளுக்கும் 

சென்று திரும்பும் இருளில்

கைகளே கண்ணாகிறது..

பரிச்சயமற்ற 

என் உள்ளத்தின் 

அறைகளைத்

தொட்டுச் செல்லும் 

உன் கண்கள் கைகளாகிறது..

கண் சிமிட்டு

சண்டையில் 

தொண்டை வெடிக்க 

சுத்தும் காதல் 

சமாதானத்தில் 

கண் சிமிட்டுகையில் 

எழும் ஒலியையும் 

விஞ்சுகிறது.. 

நானும் நீயும்

எனக்குப் பிடிக்காதென்று 

பலமுறை சொல்லியும்

அதைத் தான் செய்கிறதுன் நட்பு..

உனக்கு 

பிடிக்காதென 

நீ சொல்லாமலிருந்தும்

அதைச் செய்வதில்லையென் காதல்..

உனக்குப் பிடித்தவற்றை நானும் 

எனக்குப் பிடிக்காதவற்றை நீயும்

செய்து வருகிறோம்.

இரண்டிலுமிருக்கும் 

பிடிப்பே 

நமக்கான பிணைப்பாகிறது..

உறக்கம்.

தூங்கும் நேரத்தில் 

பேசலாமென 

துண்டிக்கிறாய் இணைப்பை.. 

பேசுகிறேன்

அந்நேரத்தில் 

நாளை பேசலாமென்று 

தூங்கிப் போகிறாய்

தூங்குமுன்னை ஏக்கமாய் 

பார்த்தபடி 

விழித்திருக்கிறதென் உறக்கம்..

உன் காதலுடன்

பெரும் விபத்தில் 

மரணத்தின் வாயில் தொட்டு 

மீண்டதிலிருந்து 

வாழ்ந்து விட துடிக்கிறேன்..

மொத்தமாய் 

உன் காதலுடன்.

இடைவெளி

காதல் வந்தமர்ந்து

விளையாட வேண்டுமென்றே

விட்டு வைக்கிறோம்

உனக்கும் எனக்குமான 

இடைவெளியை

சிறு அடி

இருசக்கர வாகனத்தில் 

உன்னை ஏற்றிக் கொண்டு 

செல்லும் போது

ஏதோ பேசுகையில் 

மகிழ்வின் வெளிப்பாடாய்

உனக்கு சிறுஅடி கொடுத்துவிட்டு

வருத்தப்பட்டேன் 

வீடு திரும்பிய பின்னும்..

அந்த சிறு அடி உனக்கும் 

பிடித்திருந்தது என்றபோதுதான் 

எனக்குள் 

எடுத்து வைத்தாய்

முதல் அடியை..

அம்மாவின் சுருக்குப்பை

அம்மாவின் 
சுருக்குப்பையில் 
பணம் சேர்த்து வை.. 
சேர்த்து வைக்கும் பணத்தை 
செலவழிக்காதே.. 
அப்போதுதான் நிறைய பணம் 
வருமென்றாய்.. 
அந்த சுருக்குப்பையில் 
உன் மீதான நேசத்தை 
கொட்டி வைக்கிறேன்.. 
நிறைந்து விட்டது ஒரே நாளில்.

வெடித்தெழு

வேதனைகளை 
வேடிக்கை பார்க்கும் 
மௌனமே 
வெடித்தெழு 
சாவதற்குள் 
ஒருமுறையேனும்.... 
வரலாறு கூறும் பழிச்சொற்களில் 
ஒன்றிரண்டு குறையக்கூடும் 
உன் சந்ததிக்கு.

உன் நினைவு

உன் நினைவுகளால் 
உருமாறி வருமென் 
நிலத்தை தாக்குகிறதுன் 
சொற்கள்.. 
சில சமயம் புன்னகை மலராக.. 
சில சமயம் பூகம்ப அதிர்வாக..

காதலின் குரல்

என்ன செய்கிறேன் 

என்ன பேசுகிறேன்

எதுவும் தெரியவில்லை..

என்ன நடக்கிறது 

என்ன கிடக்கிறது 

எதுவும் புரியவில்லை.. 

நான் இருக்கிறேனா? 

நான் இறக்கிறேனா? 

யாரும் அறியவில்லை..

என்னைச் சுற்றி 

அழும் குரல்களில் 

காதலின் குரல் மட்டும் 

அடையாளம் தெரிகிறது.. 

என்னுயிரின் மீதம்

சொட்டு சொட்டாய்

வடிந்துகொண்டிருக்கும் 

என்னுயிரின் மீதம் 

யார் கையிலாவது கிடைத்தால் 

அவனிடம் சேர்ப்பித்துவிடுங்கள்.. 

என்னை எங்கேயாவது அவன் 

தேடி தொலைந்து போகும் முன்.

கால்டுவெல் முதல் தஸ்தாவெஸ்கி வரை

உன்னிடம்
எனக்கிருக்கும்
நேசத்தை
எப்போது உணர்ந்தேன்?

இரவுகளில்
தனிமையைத் தின்று தீர்க்க
ஆரம்பித்தாயே அப்போதா?

இதயத்தின் துயரங்களை
சுமக்க சம்மதித்தாயே
அப்போதா?

அருகருகே செல்கையில்
ஸ்பரிசித்துக் கொண்டோமே
அப்போதா?

கால்டுவெல் முதல் தஸ்தாவெஸ்கி வரை
மணிக்கணக்கில்
பரிமாறிக் கொண்டோமே அப்போதா?

நமக்கிடையேயான
முரண்பாடுகளிலும்
உடன்பட்டு பயணிக்கத்
தலைப்பட்டோமே அப்போதா?

இவையாவுமாகவும் இருக்கலாம்..
இதற்கும் மேலாக
முதன்முதலில்
உன்னைச் சந்தித்த
கணமிருக்கிறதே
அப்போதுதானிருக்கும்.

நொடிநேர சுதாரிப்பு

கால்பந்தில் கோல் எடுப்பது..
மட்டைப்பந்தில் விக்கெட் எடுப்பது 
இறகுப்பந்தில் புள்ளிஎடுப்பது
சதுரங்கத்தில் வெட்டி வீழ்த்துவது 
எல்லாவற்றிலும் வெற்றி தோல்வியை 
ஒருவரின் 
கண நேர பின்வாங்குதல்
அல்லது 
நொடிநேர சுதாரிப்பு 
ஏதோ ஒன்று 
தீர்மானிக்கிறது.. 
காதல் விளையாட்டில் 
மட்டும்தான் 
ஒருவரின் வெற்றி 
இன்னொருவரின் வெற்றியாகவும் 
ஒருவரின் தோல்வி 
இன்னொருவரின் தோல்வியாகவும்
மாறுகிறது.

உதைத்தாடு

இரு குழுவாக பிரிந்து 
ஒற்றைப் பந்தை 
உதைத்தாடுவதைப் போலிருக்கிறது 
ஒற்றை நேசத்தை இருவரும் 
நட்பென்றும் 
காதலென்றும் 
பந்தாடுவது

நட்புடன் உன் காதலி

உனக்கு எழுதப்படும்
கடிதம்
மகிழ்ச்சியளிக்கிறது
நட்புடன் உன் காதலி
அல்லது
காதலுடன் உன் தோழி
என கையெழுத்துடுகையில்

நான்கெழுத்து

உன் பேர் கொண்ட 
அமைச்சரிலிருந்து 
ஐந்து வயது பையன் வரை 
அனைவரையும் பிடித்துப் போகிறது 
என் நாணத்தையும் 
மகிழ்ச்சியையும் 
பூக்கச் செய்கிறது ..
உன் பெயரின் 
நான்கெழுத்துக்கள்..

தொடர்

உன்னை நேசிக்கிறேனென 
பலமுறை சொல்லிய பின்னும் 
ஏற்றுக் கொள்ள முடியாதென 
தொடர்கிறாய் 
பிடிவாதத்தினை 
தொடர்கிறேன் நானும்
எனக்கான பிடிவாதத்துடன்.

வானம்

மழை வரும் 
நாட்களில் மட்டும்தான் 
உன்னைச் சந்திப்பதென 
முடிவெடுத்த பிறகு 
வானம் 
மேகமூட்டத்துடனேயே இருக்கிறது 
மழைக்கான அறிகுறியுடன்.. 

புழங்கப்படாத நேசத்தின் மீதான வலி

ஆதி நாட்களிலும் 
முந்தைய நாட்களிலும் 
அதற்கு பிறகான நாட்களிலும் கூட 
மாறாதிருக்கிறது 
புழங்கப்படாத நேசத்தின் 
மீதான வலி..

தேர்ந்தவை

உன்னைப் பற்றி 
எழுதுகையில் 
தேர்ந்த வார்த்தைகளை 
தேடுவதில்லை நான்..
உன்னை எழுதும்
எல்லா வார்த்தைகளும் 
தேர்ந்தவையாகிவிடுகின்றன.. 

நிறைந்திரு

நிறைத்திருக்கிறாய்
நிறைந்திருக்கிறாய்

காணக் கிடைக்கும்
அத்துணை காட்சிகளிலும்

கேட்கக் கிடைக்கும்
அத்துணை மொழியிலும்

பேசக் கிடைக்கும்
அத்துணை வார்த்தைகளிலும்

உணரக் கிடைக்கும்
அத்துணை உணர்வுகளிலும்
மட்டுமின்றி

உன்னைச் சந்திக்கக்
கிடைக்காத வாய்ப்புகளிலும் கூட

பேசி விடு

மிக நெருக்கமானவர்களுக்கு
ஒரு நாளில்
ஒருமுறையேனும்
பேசி விடுங்கள்

நேரமின்மை
நினைவின்மை
வேலைப்பளு
தொழில்நுட்பக் காரணங்கள்
இவையாவுமிருப்பினும்
ஒரு நாளில்
ஒருமுறையேனும்
எப்படியாவது பேசி விடுங்கள்

அது இருவரில்
ஒருவருக்கு
கடைசி தருணமாக இருக்கலாம்.

சாட்சிகள்

சாட்சிகள்
சம்பவ இடத்தின் பதிவுகள்
விசாரிக்கப்பட வேண்டியவை
குறுக்கு விசாரணைக்குட்பட்டவை
சாட்சிகள் திரிக்கப்படுகிறது
நீதியி கழுத்து நெரிக்கப்படுகிறது
சாட்சிகள் எதிர்கேள்விகள்
கேட்க அனுமதிக்கப் படுவதில்லை..
சாட்சிகள் எப்போதும்
சாட்சிகளாகவே இருக்கின்றன...

குற்றவுணர்வு

சாலை நடுவினில் 
சக்கரமொன்றில் 
அடிபட்டு துடித்த 
எலியினை
இன்னும் சில சக்கரங்கள்
அழுத்திச் சென்றிருக்கிறது
என் வண்டிச் சக்கரமும் 
அழுத்தி நகர்ந்த போது
ஒட்டிக் கொண்டது
குற்றவுணர்வு.

எனது முதல் மரணம்

உன்னால்
எனது முதல் மரணம்
நிகழ்த்தப்பட்டுவிட்டது

அது ஒரு பருவ காலம்
அழகிய நிலவு நேரம்
நீயும் நானும்
நேசத்தை தங்குதடையின்றி
பகிர்ந்துகொண்டிருந்தோம்

பின்னர் வந்த இரவொன்றில்
பெருக்கெடுத்தோடும்
நேசத்தின் பாதையினை
மாற்றியமைக்க
விரும்புவதாகச் சொன்னாய்

பின்வாங்க மறுத்த நேசம்
கதறியழுதது
சுவாசம் திணறியது
கண்டு கொள்ளாது
திரும்பி நின்றாய்

ஒருவழியாய்
துடிதுடித்து சாகடிக்கப்பட்டதென்
உணர்வுகள்

உணர்வுகள்
சாவதே முதல் மரணம்
எனது முதல் மரணம்
நிகழ்த்தப்பட்டுவிட்டது
உனது சுயநினைவுடன்.

நிபந்தனைக்குட்பட்ட நேசம்

சமூகத்திலிருக்கும்
சில பிற்போக்குத்தனங்களின்
ஆக்கிரமிப்பிலிருக்கும்
உன் நிபந்தனைக்குட்பட்ட நேசம்
சிரமத்தில் ஆழ்த்துகிறது
என் வாழ்வினை..

இன்னுமாய்
உனது வார்த்தைகளும்
நிகழ்த்துகிறது
எனதிடத்தில்
ஆக்கிரமிப்புகளை.

புதுமை முலாம்

அசாத்தியங்களை 
முன் வைக்கத் துணியாத 
அல்லது ஏற்க முனையாத
உனது புதுமை முலாம் 
பூசப்பட்ட பழமைகளில்
நசுக்கப்படுகிறது 
எனக்கான விருப்பங்கள்

நீ இரவு & நான் நிலவு

தூங்கும் முன்பும்

தூக்கத்தின் நடுவிலும்

எழுந்ததும்

குளித்ததும்

சாப்பிட்டதும்

அலுவலகம் செல்லும் முன்பும்

செல்லும் வழியிலும்

சென்ற பின்னும்

வேலையினிடையேயும் 

அலைபேசியை எடுத்துப்

பார்ப்பது வழக்கம்

உன் குறுஞ்செய்திக்கும் 

அழைப்பிற்கும் 

ஏங்கித் தவிக்குமென்

மனதிற்கு ஒரே ஆறுதல்

இன்னும் பத்திரப்படுத்தியிருக்கும்

ஆறு மாதத்திற்கு முன்

உன்னால் அனுப்பப்பட்ட 

‘நீ இரவு & நான் நிலவு’

எனும் குறுஞ்செய்தி.

நேசம்

அற்பமாகவும்
சொற்பமாகவும்
நினைக்கப்படுகிறயென் நேசம்
விசுவரூபமெடுத்து 
உன்னை மூழ்கடிக்கும் 
அப்போதறிவாய் 
அதன் அற்புதத்தை

நினைவு

எப்பாடு பட்டேனும் 
கரையேற்றத் துடிக்கிறேன்
உன் அதீத நேசத்தில்
மூச்சுத் திணறும் 
என் நினைவுகளை

சாட்சி

அன்பிற்குச் சாட்சியாக 
அளித்த 
பரிசுப் பொருட்களை
இரும்புப் பெட்டியிலிட்டு 
அடைத்து வைக்கிறாய்..
உன் காதலைப் போல

பதுங்குகுழி

யாரேனும் கையகப்படுத்தக் 
கூடாதெனும் 
பரிதவிப்புடன்
பதுங்குகுழி 
தேடியலைகிறதென் நேசம்

சிறு சிதறல்

எதிலும் 

வீழ்ந்துவிடக் 

கூடாதென்ற 

கவனத்தில் ஏற்பட்ட 

சிறு சிதறலில் 

நுழைந்துவிட்டாய்

என் வாழ்விற்குள்

புரிந்து கொள்

உன் பார்வையில் நட்பும்

என் பார்வையில் காதலுமாய்

தொடரும்

பயணத்தின் முடிவு

எதுவாக இருப்பினும்

அதனுள்ளே உயிர்த்திருப்பது 

புரிதலும், நம்பிக்கையுமே

புரிந்து கொள்வாய் 

நம்புகிறேன்..

துயரத்தின் வேர்கள்

உனதிருகைகளுக்கிடையேயென் 

முகம் தாங்கியுன் 

கூர் பார்வையில் 

உதடுகள் சிறிதே

விரிந்தசையும் போதிலென்

துயரத்தின் வேர்கள்

தூள் தூளாகும்.

அழை

எத்தனையோ பேரை

நண்பனென அழைக்கும்போதும் 

அறிமுகப்படுத்தும் போதும் 

பிறரிடம் சொல்லும் போதும் 

இல்லாத ஒன்று 

உன்னை 

நண்பனென 

அழைக்கும்போதும் 

அறிமுகப்படுத்தும் போதும் 

பிறரிடம் சொல்லும் போதும்  

வந்து ஒட்டிக் கொள்கிறது.. 

சிறு வெட்கத்தினூடாக ...

ஊடல்

உன்னிடம் 

ஊடல் கொள்ளும் போது

தோழியர்களிடம் 

கொட்டித் தீர்த்து விடுகிறேன்

ஒரு போதும் 

சொல்லியதில்லை

ஊடல் தீர்ந்து கூடியதை..