தேவதை உங்களை வரவேற்கிறாள்...

உண்மை

2012-02-17T14:42:00.009+05:30

ஏதோ ஒன்றை

பெறும் போது

ஏதோ ஒன்றை

இழந்துவிடுகிறோம்

என்பதும் உண்மை

காதும் மனதும்

2012-02-17T14:42:00.007+05:30

காதும் மனதும்

ஒன்றுதான் போலும்..

தம்மில் சேரும் அழுக்குகளைத்

தானே அகற்றும்

வித்தை தெரிந்தவை..

மழை

2012-02-17T14:42:00.004+05:30

ஒரு மணி நேர மழைக்கே

தாங்காத சென்னை போலவே

ஒருமுறை திரும்பிப் பார்த்த

உன் பார்வைக்கே

தாங்காமல் திண்டாடுகிறது

என் மெல்லிய சிறுமூளை

கனவு

2012-02-17T14:42:00.002+05:30

தொட்டுவிடும் தூரத்தில்

நம் கனவுகள்..

தொடர்கிறேன்

உன் வார்த்தைகளில் ஊறி..

உன் பார்வையில் ஏறி..

யாதுமாகி

2012-02-17T14:40:00.005+05:30

வெட்டுப்பட்ட இடம் துளிர்க்கும்

காயம்பட்ட மனம் ஆறும்

தேடலிருந்தால் கிடைக்கும்

உண்மையிருந்தால் நிலைக்கும்

அலைபாய்ந்த நேசம் இளைப்பாறும்

யாவும் கண்டேன் உன் வருகையில்

யாதுமாகி நிற்பேன் உன் வாழ்க்கையில்

வெறுமைக் கோப்பை

2012-02-17T14:40:00.002+05:30

நிரம்பிருந்த என் வெறுமைக் கோப்பைகளை

ஒவ்வொன்றாய் களவாடிப் போனாய்..

துயர் வழிந்திருந்த என் காலச் சருகுகளை

காற்றாகவே பறக்க செய்தாய்..

தேம்பித் திரிந்த என் மௌனங்களை

சொட்டு சொட்டாய் விடுவித்தாய்..

சமரசத்திற்குடன்படாத என் நேசத்தை

உடன்படிக்கை ஏதுமின்றி பாதுகாத்தாய்..

விதை பழுதா? நிலம் பழுதா? கேட்டு

முடிக்கும் முன் அறுவடைக்கு வந்து நின்றாய்..

பிழை என்னிலா? அவனிலா?

எந்த கேள்வியின் எழுப்புதலுமின்றி

என்னுடனே வாழ சம்மதித்தாய்..

என்னில் எதுவுமின்றி உன்னிடம் வருகின்றேன்..

உன்னை நிரப்பி என்னை ஆளச் செய் இப்பேருலகை..

ஒரே ஒரு வேற்றுமை

2012-02-17T14:39:00.003+05:30

புதிய காதலுக்கும்

பழைய காதலுக்கும்

ஒரே ஒரு வேற்றுமையும்

பலப்பல ஒற்றுமையும்

இருக்கிறது..

நெடுநேரம் பேசுவது

இரவுகளில் கரைவது

பார்க்கத் துடிப்பது

படித்ததை பகிர்வது

பிடித்ததை செய்வது

இப்படி ஒற்றுமை பலப்பல..

வேற்றுமை என்னவெனில்

ஏதோவொரு காரணத்திற்காக

உங்களாலோ

அவளா(னா)லோ

நிராகரிக்கப்பட்ட

மறுதலிக்கப்பட்ட

புறக்கணிக்கப்பட்ட

காதலுக்கு

வாழ்தலின் அர்த்தம் உணர்த்தி

நம்பிக்கையின் நீரூற்றும் பாங்கே...

தலையும் பூவுமாய்

2012-02-17T14:39:00.000+05:30

என்னை

என்னிடமிருந்து கடத்திப் போன

முக்கிய குற்றவாளிகளில்

முதல் இடம்பிடிக்கக்கூடியது

காதல்தான்..

என்னை

என்னிடமே திருப்பித் தந்த

முக்கிய நிரபராதிகளில்

கடைசியில் இடம்பெறக்கூடியதும்

காதல்தான்

எனது நாணயத்தின்

தலையும் பூவுமாய் இருந்த காதல்

உருமாறத் துவங்கியிருக்கிறது

பச்சைபடர்ந்த தாள்களாய்..

அத்துணை உணர்வுகளின் கலவை

2012-02-17T14:37:00.002+05:30

எனக்குள்

தேடித் திரிந்த

வேண்டி தவித்த

சொல்லத் துடித்த

அத்துணை உணர்வுகளின்

கலவையாக

உணரக் கிடைத்தாய்...

இனி எப்போதும்

உன்னை தவறவிடுவதற்கில்லை..

கடந்து போன

எனது பழைய பக்கங்களிலும்

உன்னை இட்டு நிரப்பியே

ஞாபகங்களை செம்மைப் படுத்துகிறேன்..

மென்மனச் சிட்டுக்குருவி

2012-02-17T14:36:00.004+05:30

கொத்தி கொத்தி உண்ணும்

சிட்டுக்குருவியின்

பெரும்பசியோடு

உன் நினைவுகளைக் கொறிக்கிறேன்

கொறிக்க கொறிக்க கூடுகிறது

உன் நினைவின் பசி..

--------------

கொத்தி கொத்தி உண்ணும்

சிட்டுக்குருவியின்

பெரும்பசியொத்தது

உன் நினைவு தானியங்களைக்

கொத்தி தின்னும்

என் மென்மனச் சிட்டுக்குருவியும்

சந்திப்பிற்கு பின்..

2012-02-17T14:36:00.003+05:30

நான் விரும்பிய காதலின்

அத்துணை சாயல்களும் கொண்டு

நான் பார்த்திராத

புதிய சாயலொன்றுடன்

வந்தாய்

என் சாபங்கள் மறைந்து

தேவதையானேன்

உன் சந்திப்பிற்கு பின்..

ஆசிர்வதிக்கப்பட்டவர்கள்

2012-02-17T14:35:00.003+05:30

எல்லாம் தீர்ந்த பின்னும்

ஏதோ மிச்சம் இருப்பதகாவே

கற்றுத் தரும் காதலை

உணர்பவர்கள்

ஆசிர்வதிக்கப்பட்டவர்கள்..

இனி வரும் காலம்

2012-02-17T14:35:00.000+05:30

என் கனவுகளின் நாயகனுக்கு....

உன் காதலுடன்

நான் நடந்து செல்லும் பாதையெங்கும்

பூத்துச் சிரிக்கின்றன

பெயர் தெரியா பூக்கள்..

பறந்து திரிகின்றன

பெயர் அறியா பறவைகள்..

உன் காதலுடன்

நான் நடந்து செல்லும் பாதையெங்கும்

சாரல் அடிக்கின்றது ...

பார்த்தறியா மேகத்திலிருந்து

கூதல் பிடிக்கின்றது

உணர்ந்தறியா காற்றிலிருந்து..

உன் காதலுடன்

நான் நடந்து செல்லும் பாதையெங்கும்

பார்க்கும் முகங்கள்

உன் முகமாகின்றன..

கேட்கும் பெயர்கள்

உன் பெயராகின்றன..

ஏதுமற்ற

எதிர்பார்ப்புகளற்ற

பயணத்தினூடே

வழித்துணையாய் வந்து

வாழ்க்கைத் துணையானாய்

இதுவரை வாழ்வு கசந்தபோதும்

இனி வரும் காலம் வசந்தமாகும்

மழைக்கால சாட்சி

2012-02-17T14:34:00.002+05:30

இன்றிரவு பெய்த மழையை

ரசிக்க முடியவில்லை..

தன் வெண்துளி கரங்களால்

விடாமல் துரத்திய அதன் ஆக்கிரமிப்பு

ஐம்புலன்களையும்

சுருக்கிக் கொள்ள இட்டக் கட்டளை..

சேர்க்கையின் குறியீடெனவிருந்த நினைவுகளை

பிரிவின் குறியீடாக மாற்றிவிட்டது..

ஆழப்புதைந்த மதிப்பீடுகளை

அர்த்தமிழக்க செய்தததில்

மழைக்கு பங்குண்டு..

துயரும் புதிருமான முந்தைய நிகழ்வுகளுக்கு

முன்னொரு மழைக்காலம் சாட்சி எனும்

ஒரே காரணத்திற்காக..

சிதிலமடைந்த ஞாபகங்கள்

2012-02-17T14:33:00.002+05:30

இன்னும் விசாரிக்கப்படாமல்

நிலுவையில் நிற்கக்கூடிய

கேள்விகள் சிலவற்றிற்கு

பதிலேதும் இல்லை..

ஆவணப்படுத்தப்பட்ட

உனது ஆணவங்களை

தூக்கி எறியவோ

நெருப்பில் எரிக்கவோ கூடவில்லை

உறுதிமொழியற்ற

பேச்சுவார்த்தைகளுக்கு

உடன்போக்கு சென்ற

உயிருக்கு தற்போது நினைவு இல்லை..

ஓய்ந்து போன முயற்சிகளுக்கு

உரமூட்ட உனது சாயலில்

ஆனால் உன்னைப் போலல்லாத

நிழல் ஒன்று நிஜமானது

பழையவை துறந்து

புதியவை பிறந்த நாளொன்றில்

முன் சுவடுகளை அழிக்கும்

நோக்கம் தலை எடுக்குமுன்

மன்னிக்கவோ மறக்கவோ

தயாராக இருந்தது

சிதிலமடைந்த என் ஞாபகங்கள்..

மூன்றாம் நபர்

2012-02-17T14:32:00.002+05:30

காதலற்ற வாழ்விற்கும்

கவிதையற்ற வாழ்விற்கும்

சிறு நூலிழை வித்தியாசம்

ஏதும் இருப்பதாக தெரியவில்லை..

இரவுகள்தோறும் ஊறித் திளைத்த

இரண்டும் ஒன்றையொன்று

வெறித்துப் பார்த்ததன்

காரணமும் புரியவில்லை..

மிக நீண்ட போராட்டம்

தேவைப்பட்டதை

இரண்டின் வரவிலும்

உணர்ந்த கணத்தை மறக்கவில்லை..

வெற்றி தோல்வி குறித்த

அவசியமின்றி நகர்ந்த நொடிகளில்

நஞ்சு கலந்த துயரமொன்று

பரவிப் படர்ந்ததை கவனிக்கவில்லை..

எவர் கேள்விகளுக்கும்

பதில் சொல்ல தயாரில்லாத

இரண்டும் ஒருநாள்

தற்கொலை செய்துகொண்டதையும்

இதுவரை மூன்றாம் நபர் யாருக்கும்

தெரிவிப்பதற்கு

காதலோ கவிதையோ உயிருடன் இல்லை..

காதல் கதை

2012-02-17T14:30:00.000+05:30

என் காதல்

கதையாகிவிடுமோ

எனும் தவிப்பில் நான்..

உன் கதையே

காதலுக்கு மூலமானதின்

பூரிப்பில் நீ..

இனி காதல்

கதையாக வேண்டாம்..

கதையும்

காதலாக வேண்டாம்..

கவிதையும் காதலுமாய்

சேர்ந்திருப்போம்..

மனதில் மனமாய்

வாழ்ந்திருப்போம்..

எனதின் நானும் நானின் எனதும்..

2012-02-17T14:29:00.002+05:30

நகர்ந்து நகர்ந்து மறையும்

பயணக் காட்சிகளாய்

என் தேர்வுகளும் தேடல்களும்...

உருகி உருகி உறையும்

பனிக்கட்டிகளாய்

என் ஏக்கமும் எதிர்பார்ப்பும்..

விலகி விலகி இணையும்

தண்டவாளங்களாய்

என் நேசிப்பும் வாசிப்பும்..

தோற்க தோற்க முயலும்

மழைத்துளியாய்

என் பயணமும் பாதையும்..

இருள இருள ஒளிரும்

தொலைதூர வெளிச்சமாய்

என் கனவுகளும் கற்பனைகளும்

விழ விழ எழும்

கடலலையாய்

எனதின் நானும் நானின் எனதும்..

அறுவடை

2012-02-17T13:48:00.003+05:30

உன்னை எந்த சமயத்திலும்

எந்த காரணத்திற்காகவும்

வெறுக்க மாட்டேன்..

ஏனெனில் வெறுப்பின்

வலியறிந்தவள் நான்..

மறுதலிக்கவோ

நிராகரிக்கவோ

புறக்கணிக்கவோ

உதாசீனப்படுத்தவோ

தெரியாது என் நேசத்திற்கு..

தெரிந்ததெல்லாம்

நேசிக்க மட்டுமே..

அதன் மூலம் காயம் கொள்ளவும்..

அதற்கு மேல்

இம்மியும் அறிந்திராத

என் நேசத்தை உனக்குள்

விதைத்திருக்கிறேன்..

அதன் நிழலில்

நீ இளைப்பாறும்

நாள் வரும்வரை

விலகியிருக்கட்டும்

நம் இருவருக்குமான

நெருக்கம்...

அந்த விலகலில்

துளிர்த்துக் கொண்டே இருக்கும்

யாராலும் அறுவடை செய்து

முடிக்க முடியாத

பெரும் விளைச்சல்..

உன்மடி

2012-02-17T13:47:00.002+05:30

அழுதழுது

தேம்பி கண்ணயர்ந்து

கனவில் உன் மடியில்

தலைசாய்க்கிறேன்..

தூக்கத்தில் புரண்டு படுக்கையில் உணர்ந்தேன்

உன்மடியில் என் தலையிருப்பதை...

கேள்வி

2012-02-17T13:46:00.003+05:30

சில கேள்விகளுக்கு

பதில் சொல்வதற்காக

சில சமயம்

சிலரிடம்

பேச வேண்டியிருக்கிறது

அந்த கேள்வி

முக்கியத்துவமானதில்லை

என்றபோதும்

சில சமயம் அந்த நபரும்...

குறுஞ்செய்தி

2012-02-17T13:45:00.003+05:30

உனது குறுஞ்செய்தியை

கண்டும் காணாமல்

இருக்கப் பழகும்

முயற்சியில்

தோல்வியடைகிறேன்

சத்தமிட்டோ

அதிர்வெழுப்பியோ வரும்

உனது குறுஞ்செய்திகள்

என்னிடமிருந்து புதிதாய்

எதைப் பதிலாக பெறப்போகிறது?

அதனாலே

எனது மெளனத்தை

அணிவிக்கிறேன்

எனதலைபேசிக்கும்..

சலனமற்றிருக்கும் எனதுடல்

2012-02-17T13:45:00.000+05:30

மார்பு வலியில் விம்முகிறது

தொண்டை அடைக்கிறது

வயிற்றில் அமிலம் சுரப்பது

அப்படியே தெரிகிறது

கைகள் உதறல் எடுக்கிறது

மூச்சுவிடுவதில் சிரமம் ஏற்படுகிறது

வாந்தியோ, குமட்டலோ வருகிறது

நேசத்திற்குரியவர்களின்

அதி கோபத்தில்

வார்த்தைகளால்

அறையப்படும்போது

மேற்சொன்னவையெல்லாம்

தானாகவே நடக்கின்றன..

ஒருநாள் கூட்டைவிட்டு

பறந்துவிடவும் கூடும்

காற்றெனப்படும் உயிர். .

அப்போது வீசப்படும்

வார்த்தைகள் குறித்து

வலியோ, நடுக்கமோ, உதறலோ இன்றி

சலனமற்றிருக்கும் எனதுடல்..

கடை பொம்மை

2012-02-17T13:43:00.002+05:30

எல்லா உணர்ச்சிகளையும்

புதைத்துவிட்டு

எப்போதும் புன்னையுடன் இருக்கிற

கடை பொம்மையைப் போல

இருக்க வேண்டுமென்ற

எதிர்பார்ப்புகளை ஒருபோதும்

நிறைவேற்ற தெரியவில்லை

ஊமையாகவோ,

காது கேளாதவளாகவோ

பிறந்திருக்கலாமோவென

நினைக்கத் தோன்றுகிறது

சில சமயங்களில்

தற்கொலை செய்துகொண்டு விடுவேனோ

எனும் பயம் தொற்றிக் கொள்கிறது..

கண்ணீர் ததும்பி

கணிணி திரையினை

மறைக்கிறது..

கைகள் நடுங்கி

விரல்கள் உதிர

கீபோர்டிலுள்ள எழுத்துகளும்

சேர்ந்து உதிர துவங்கின..

வெற்றிடத்தின் கடைசிப் புள்ளி

2012-02-17T13:26:00.002+05:30

அந்த கணம் அப்படியே

நெஞ்சில் ஆழ உறைந்துவிட்டது

கேள்விகளும்

எதிர்கேள்விகளுமாய்

கடந்து போன நிமிடத்தின்

பதற்றங்கள் இன்னும் தணியவில்லை

சிரித்துப் பேசியபடியோ

கொஞ்சிப் பேசியபடியோ

நெருங்கும்போது

முந்தைய கோபக்கங்குகளின்

அனலை உணர்கிறேன்

இருவருக்குமிடையில்

விழத் துவங்கியிருக்கும்

வெற்றிடத்தை

எதைக் கொண்டு நிரப்புவதென

சிந்திக்கிறேன்..

உனது கேள்விகளை

உனது கோபங்களை

எந்தவித கவசமுமின்றி

எதிர்கொள்வதென

இப்போதைக்கு

உத்தேசித்துள்ளேன்..

வெற்றிடத்தின்

கடைசிப் புள்ளி மறையும்போது

நாம் மேற்கொண்டு பேசலாம்

ஒரு நண்பனைப் போல் நீயும்

ஒரு தோழியைப் போல் நானும்

ஒரு புன்னகையின் பின்னால்

2012-02-17T13:26:00.000+05:30

சமாதானத்தை

முன்னெடுப்பதில்

இருவருமே சளைத்தவர்களில்லை

இம்முறை

சமாதானம் தேவையா?

என்கிற கேள்வி தொக்கி நிற்கிறது

ஒவ்வொருமுறையும்

என்னால் சமாதானத்திற்கு

முன்வைக்கிற புன்னகை குறித்து

அலட்சியம் வெளிப்படுகிறது உன்னிடம்

இம்முறை சமாதானத்துடன்

நெருங்குகிறாய்..

இனியெப்போது வேண்டுமானாலும்

எந்தபக்கமிருந்தும்

ஆபத்து நிகழக் கூடுமெனும்

எச்சரிக்கையுடன் ஏற்றுக்கொள்கிறேன்

ஒரு புன்னகையின் பின்னால்

வடிந்துகொண்டிருக்கும் கண்ணீரின் கணத்துடன்.

பிரியங்களின் அந்தாதி

2012-02-17T13:25:00.002+05:30

அதீத பிரியங்களின் பொருட்டு

எழுகிற சிறு சிறு சண்டைகளில்

மீதம் இருக்கிறது அதே பிரியம்

அதீத கோபங்களில் பொருட்டு

எறியப்படும் வார்த்தைகள் வடிந்தபின்

மீதம் இருக்கிறது அதே பிரியம்

அதீத எச்சரிக்கையின் பொருட்டு

உருவாகிற தவறுகளின்

தடயங்கள் மறைந்தபின்

மீதம் இருக்கிறது அதே பிரியம்

பிரியத்தை அழித்து

மீள் உருவாக்கம் செய்யும் போதும்

பிரியத்தை பிரியத்தால்

துரத்தும் போதும்

சிந்துகிறது ஓராயிரம் பிரியங்கள்

பிரியம் தொலைக்கப்பட்டு

மீண்டும் கிடைக்கும் போதும்

பிரியம் புதைக்கப்பட்டு

மீண்டும் வளரும் போதும்

உருவாகிறது ஆயிரமாயிரம் பிரியங்கள்

பிரியத்தை பிரியத்தைக் கொண்டே

அறுக்க முடியும்

வைரத்தைப் போல

பிரியத்தை பிரியத்தைக் கொண்டே

உருவாக்க முடியும்

தண்ணீரைப் போல

------------

தண்ணீரைப் போல

பிரியங்கள் எல்லா நூல் இழைகளிலும்

ஊடுருவி தனக்கான இயங்குதளத்தை

வடிவமைத்துக் கொள்கிறது

தண்ணீரைப் போல

எல்லா இடங்களிலும் வியாபித்திருக்கிறது

தண்ணீரைப் போல சலனமடைகிறது

தண்ணீரைக் குடிப்பது போல

யாராவது ஒருவர் பிரியத்தைக் காலிசெய்துவிடுகின்றனர்

தண்ணீரைப் போல மூழ்கடித்துவிடுகிறது சில பிரியம்

தண்ணீரைப் போல இடம் பொருள் ஏவலுக்குத் தகுந்தபடி

தன்னை மாற்றிக் கொள்கிறது பிரியம்

பிரியங்கள் மாறும் போதும்

தாகம் தணிக்கத்தான் செய்கிறது சிலவகை தண்ணீர்

தண்ணீரின் குணம் மாறும்போதும்

மாறாமலிருக்கிறது சிலவகை பிரியம்

---------------

பிரியம் கொண்ட மனதின் மகிழ்வுகளும்

பிரிந்து கொண்ட மனதின் வலிகளும்

பிரியம் கொண்ட ஒரு மனதால்தான்

புரிந்துகொள்ளப்படும்

பிரியம் கொள்ளுமுன் யாரும்

பிரிவோம் என்று நினைப்பதில்லை

பிரிந்தபின் யாரும் பிரியமில்லை

என்று மறுப்பதில்லை

நம்பிக்கையால் துளிர்க்கும் பிரியம்

ஒருபோதும் வெட்டப்படுவதில்லை

துரோகத்தால் வெட்டப்படும் பிரியம் மட்டும்

எப்போதும் துளிர்ப்பதில்லை

பிரியத்தின் எதிரி பெரும்பாலும்

பிரியங்களின் சாயல் கொண்டவை..

பிரியத்தின் நிழலில்

உறங்குவதற்கும்

இளைப்பாறுவதற்கும்

காத்துக்கிடக்கின்றன

ஏராளமான இதயங்கள்

-----------------------

இதயங்கள் பலவகைப்படும்

இரக்கமுள்ள இதயம்

எதையும் தாங்கும் இதயம்

வலியுள்ள இதயம்

இவையாவற்றுக்கும் மாறான இதயம்

இப்படி...

அவையாவும் அப்படியாவதற்கு

காரணம் ஒன்றே

அதீத பிரியம்..

சந்திப்பு

2012-02-17T13:13:00.002+05:30

ஒவ்வொரு சந்திப்பிலும்

வெளிச்சம் போல பரவுகிறாய்

ஒளிர்கிறேன்

வானமெங்கும்

பூமியெங்கும்..

நமக்கிடையேயான யாவும்

2012-02-17T13:10:00.000+05:30

பொங்கும் உன் மகிழ்வு

ஏங்கும் உன் பாசம்

தாங்கும் உன் துயரம்

தூங்கும் உன் அழகு

யாவற்றையும் அறியும் முதல் தோழியாய்

உன்னை நேசிக்கும் இறுதிக் காதலியாய்

தொடரும் என் பயணத்தில்

மாறியும் மாறாமலுமாய் இருக்கிறது

நமக்கிடையேயான யாவும்..

வலி

2012-02-17T13:09:00.006+05:30

கடும் காய்ச்சலாலும்

கொடும் வயிற்றுவலியாலும்

பெரும் கழுத்துவலியாலும்

நீ அவதிப்பட்டு அழும்போதெல்லாம்

வலியில் சுருண்டு போகிறேன்

இரைவிழுங்கிய மலைப்பாம்பென

இரண்டும்

2012-02-17T13:09:00.003+05:30

வந்து வந்து மறைகின்றன...

மகிழ்வின் போது

கோபத்தில் முகம் திருப்பியதும்

கோபத்தின் போது

வாரியணைத்துக் கொண்டதும்

தாயுமானவன்

2012-02-17T13:08:00.002+05:30

கோபம் வந்தால் அரற்றி

கொஞ்சம் கழித்து அரவணைத்து

பசியறிந்து பரிமாறி

துயரறிந்து துணிவூட்டி

யாதுமாகி நின்றாள் என் அம்மா

தாயுமாகி வந்தாய் நீ

பிறவியின் பயன்

2012-02-17T13:05:00.002+05:30

இந்த பிறவியின் பயனை

அடைந்துவிட்டேனென்று

உணர்ந்தபோது

நீயுன் காதலை

எனக்கு கையளித்துக் கொண்டிருந்தாய்..

கசப்பு

2012-02-17T12:56:00.003+05:30

எனது அத்துணை

கசப்புகளையும்

செரித்து வெளித்தள்ளும்

பக்குவம் வாய்த்திருக்கிறது

உனது காதலுக்கு..

சந்திப்பின் முன்னும் பின்னும்

2012-02-17T12:55:00.004+05:30

சந்திப்பின் முன்னும் பின்னுமான

நிகழ்வுகளை

அசைபோடும் ஒவ்வொரு முறையும்

திகைப்பும் வியப்பும் மேலிடுகிறது

உனக்குள்ளும் எனக்குள்ளும்

நாமறியாமல் துளிர்த்த நேசம்

இன்று விருட்சமாகி நிற்கும் பேரழகைக் கண்டு..

அடையாளம்

2010-12-04T20:54:00.005+05:30

எல்லாமே அனுபவம்தான்

வாழ்வதும்..

வீழ்வதும்..

வாழ்வது வெற்றியின் அடையாளம்..

வீழ்வது வெற்றியின் அலங்கோலம்.

வாழவிரும்புகிறேன்..

அடையாளத்தோடு

செத்துப் போ

2010-12-04T20:54:00.002+05:30

போராடி வாழ்ந்து

போரடித்து விட்டது..

கொஞ்சம் செத்துப் போகலாம்..

போராடாமல்.

மழைத்துளி

2010-12-04T20:53:00.005+05:30

உப்பிய பலூனாய்

மேலே மேலே பறக்கிறேன்..

ஒரு சின்ன ஊசியுடன்

என்னெதிரே வருகிறாய்

மழைத்துளியின் வடிவில்..

மழை

2010-12-04T20:53:00.002+05:30

என் காதலை

மேகத்த்திடம்

சொல்லியிருந்தால்

மழை தந்திருக்கும்..

உன்னிடம் சொல்லியதால்

வலி தந்தாய்..

என் வலியை

உன்னிடம் சொல்லுகிறேன்..

முகம் திருப்புகிறாய்..

மரணத்திடம் சொல்லுகிறேன்..

மீட்டு விடும்..

காதல்

2010-12-01T23:56:00.002+05:30

நான் சொல்வதெல்லாம் காதல்

காதலைத் தவிர
வேறொன்றுமில்லை..

நாளொரு மேனி

2010-12-01T23:54:00.002+05:30

வளர்த்துக் கொண்டேதான் இருக்கிறேன்

நாளொரு மேனியும்

பொழுதொரு வண்ணமுமாக

உன்னால் கண்டுகொள்ளப்படாத

நேசத்தை..

நேசம்

2010-12-01T23:49:00.001+05:30

என் நேசம்

உன்னைக் காயப்படுத்தினால்

நிறுத்திக் கொள்வேன்

என் சுவாசத்தை..

சாலை விதி

2010-11-30T23:40:00.005+05:30

சாலை விதிகள்

மட்டுமே

பழக்கபட்ட எனக்கு

உனது காதலின் விதிகள்

புதிதுதான்..

விதி கொல்லுமோ?

அல்லது

விதியை கொல்வேனோ?

விளையாட துணிந்துவிட்டேன்..

உனது விதிகளோடு..

சிறு பிள்ளை

2010-11-30T23:40:00.002+05:30

பெரிதாக ஒன்றுமில்லாத

விஷயத்தை

பெரிதாக்கி

சிறு பிள்ளையென

காட்டுகிறாய்..

சிறிதாக

நடப்பவற்றை

பெரிதாக்கி

பேசுகையில்

உணர்கிறேன்

நானும் சிறு பிள்ளையென.

நேசம்

2010-11-30T23:39:00.005+05:30

உனக்காக எழுதப்பட்ட

உன்னால் எழுப்பப்பட்ட

கவிதைகளை

புத்தகமாக்கும்

முயற்சியில்

இருவரும் தேர்ந்தெடுக்கிறோம்..

நான் வாசிக்க

நீ ஆமோதிக்க

ஆயிரம் கவிதையில்

ஆறேழு கவிதை தவிர

அத்தனையையும்

தேர்ந்தெடுத்தோம்..

அத்துணை கவிதைகளும்

ஏக்கத்துடன் பார்க்கின்றன..

நம்மை தேர்ந்தெடுத்த

நேசம் அனாதையாய் அலைவதை.

உடை

2010-11-30T23:39:00.002+05:30

உடைத்து விடக் காத்திருக்கிறாய்

ஒரு நேசத்தை

உருவாக்கிட காத்திருக்கிறேன்

ஒரு உறவை..

புன்னகை

2010-11-30T23:38:00.005+05:30

புன்னகையோடு நீ பேசுகிற நாட்கள் எனக்குள்

விசிறிக் கொண்டிருக்கின்றன..

மீண்டும் மீண்டும்

அனல் கொண்ட காதலை

இயலாமை

2010-11-30T23:38:00.002+05:30

முன்னிரவில்

காயமாக்கி திரும்பும்

உன் வார்த்தைகள்

பின்னிரவில்

காயமாற்றி

உறங்குகின்றன..

இரண்டின் போதும்

விழிப்பற்று கிடக்கிறது

என் இயலாமை..

முத்தம்.

2010-11-26T14:55:00.004+05:30

பயப்படாதே..

நமக்கிடையேயான

சிறு அனுபவங்களும்

கவிதையாவதைப் போல்

ஆகிவிடாது

நம் முதல் முத்தம்..

துளிமழை

2010-11-26T14:55:00.001+05:30

என் நேசம் ஆக்கிரமிப்பின்

வெளிப்பாடல்ல..

அக்கறையின் துளிமழை..

மனம்

2010-11-26T14:54:00.005+05:30

என்னை அதிகம் புரிந்து

வைத்திருப்பதாக காட்டுகிறாய்

உணர்வதில்லை..

அதை விட உன்னை அதிகம்

புரிந்து வைத்திருக்குமென் மனம்

காட்டுவதில்லை..

உணர்வதால்..

ஈர்ப்பு

2010-11-26T14:54:00.002+05:30

இருதுருவங்களின் ஈர்ப்பு குறையலாம்

கடுகளவேனும்..

என் பெருங்காதலின் ஈர்ப்பு குறையாது

அணுவளவும்..

துண்டுசீட்டு

2010-11-26T14:53:00.002+05:30

சாலையோரங்களில்

விநியோகிக்கப்படும்

துண்டுசீட்டுகளை

வாங்கி பறக்கவிடும்

பாதசாரியைப் போல நீ..

துண்டுசீட்டாய் என் காதல் ..

அரட்டைப்பெட்டி

2010-11-20T21:40:00.002+05:30

நீ பதிலிறுக்க மறுக்கும்

மின்னஞ்சலின் அரட்டைப்பெட்டி

பச்சை ஒளிர்ந்து சொல்லிக்கொண்டே இருக்கிறது..

நீ பதிலுருக்காவிட்டாலும் பார்த்தபடியிருப்பதை

சொற்கள்.

2010-11-20T21:31:00.003+05:30

நிர்வாணமாய் நகரும்

என் நேரத்தில்

ஆடை உடுத்தி

அழகு பார்க்கிறது

உன் சொற்கள்..

அடையாளம்

2010-11-20T21:31:00.000+05:30

காதலுக்கான அடையாளங்களென

சுட்டிக்காட்டிய அனைத்தையும்

தவிர்க்க முயல்கிறாய்..

அதுவே ஒரு அடையாளமாய்

காட்டிக்கொடுக்கிறது

உன் நேசத்தை .

மழை-2

2010-11-20T21:29:00.004+05:30

அடித்துப் பெய்யும் மழை

உன் ஆழமான அன்பை சொல்கிறது..

தூறிச் செல்லும் மழை

உன் அன்பை அழகாகச் சொல்கிறது..

மழை

2010-11-20T21:29:00.001+05:30

உனக்கு

பிடித்திருக்கும்

சன்னலோர மழையை

ரசிக்கிறாய்..

நனைய மட்டும்

மறுக்கிறாய்..

மழையாய் நான்..

விலை

2010-11-14T11:30:00.003+05:30

எந்த விலை கொடுத்தும்

பெற முடியாது

நம்பிக்கையையும்

காதலையும்

ஏனெனில்

இரண்டும்

விலைமதிப்பற்றது.

திரும்பிப்பார்

2010-11-14T11:29:00.002+05:30

உனக்கான யாவும்

தீர்ந்து முடிந்தபின்

திரும்பிப்பார்

நின்றிருப்பேன்..

காதலின் கையைப் பிடித்தபடி..

வார்த்தை

2010-11-14T11:28:00.003+05:30

இவ்வளவு நாட்கள்

வெளிப்படுத்தப்பட்ட

நேசத்திற்கு

விலை கொடுக்க

தயராகிறாய்..

உன் வார்த்தைகளால்..

பெற்றுக் கொள்வேன்

என் மௌனத்தால்.

காயங்கள்

2010-11-14T11:28:00.000+05:30

என்னிடமிருந்து

ஏதேதோ

பெற்றிருக்கிறாய்..

உன்னிலிருந்து

அள்ளிக்கொண்டது.. ஒன்றுதான்..

காலத்தாலும் மீட்க முடியாத

காயங்கள்..

சொர்க்கம்

2010-11-14T11:27:00.002+05:30

நமது கடந்த காலங்களை

உனக்கு நினைவூட்டுவது

ஒருவேளை எரிச்சல் தரலாம்...

எனக்கு அவை சொர்க்கம்.

வலி

2010-11-14T11:26:00.003+05:30

பெரியதாக தோன்றுகிறது

உன் மீதான காதல்

சிறியதாக தோன்றுகிறது

ஒன்றுமற்ற உன் வாதம்

நடுவில் ஓடிக் கொண்டிருக்கிறது

வலிமையாக காலம்

சிறு நம்பிக்கையோடு.

பிடிமானம்

2010-11-14T11:26:00.000+05:30

ஒரு பிடிமானமும்

இன்றி அற்று விழும்போது

தாங்கிப்பிடிக்கிறாய்..

நிரந்தமாய் தங்க விரும்புகையில்

பிடி தளர்த்துகிறாய்..

துவண்டு

2010-11-14T11:25:00.000+05:30

எனது சின்னஞ்சிறிய

நம்பிக்கையின் மீது

கல்லெறிகிறாய்...

துவண்டு விழுமது

துளிர்க்கிறது

மீண்டும்

அளப்பரிய ஆற்றலுடன்..

கற்களை கோட்டைகளாக்கி..

மரணம்

2010-11-14T11:24:00.002+05:30

மரணம் பற்றிய கவிதைகளை

நீ ஒருபோதும்

விரும்புவதில்லை..

ஒதுக்கிவிடுகிறாய்

வாசிக்கமாலே ..

அதன் வாசனை அடித்தாலே..

உனக்கு தெரிவதற்கில்லை..

நீ மரணத்தின் தூதுவன் என ..

திருப்பி

2010-11-14T11:23:00.002+05:30

திருப்பிக் கொடுத்து விட்டாய்...

அனைத்தையும்...

பதிலுக்கு தருகிறேன்..

என் உயிரை..

வழிமுறை

2010-11-13T17:07:00.002+05:30

அனைத்து விதமான

வழிமுறைகளையும்

கையாளுகிறோம்..

விட்டு விட நீயும்..

விடாமலிருக்க நானும்..

அன்பு

2010-11-13T12:27:00.004+05:30

என் அன்பு

பூரணத்துவமானது

எனில் பலிக்கட்டும்.

இல்லை

உன் பிடிவாதத்தில்

பலியாகட்டும்.

காதல்

2010-11-13T12:27:00.001+05:30

ஏமாற்றியது

நீயோ நானோ

அல்ல.

ஏமாந்து போனதென்னவோ

காதல் தான்.

குரல்

2010-11-13T12:26:00.004+05:30

எவ்வழி சென்றாலும்

எனக்குள்ளே

ஒரு வலியாய்

உன் குரல்

ஆறுதல்

2010-11-13T12:26:00.001+05:30

ஆறுதல் தேவை இல்லை..
ஆறாமல் இருக்கும் வரை தான்

நினைத்ததை முடிக்கும் வேகம் இருக்கும்.

நீ

2010-11-13T12:25:00.003+05:30

நீ நினைத்திருக்கிற
யாவும் நடக்கும் என
நள்ளிரவில்
பிறந்ததின வாழ்த்துக்கள் சொல்லி
மகிழ்வூட்டினாய்..
நான் நினைத்திருக்கும்
நீ என்னுடன் கைகோர்த்து
நடந்தால் போதும்..

சுவாசம்

2010-11-13T12:25:00.000+05:30

காரணங்கள் சொல்வதற்கில்லை

சில விஷயங்கள் தோன்றுவதற்கும்

மறைவதற்கும்

சுவாசம் நடைபெறுவதை போல..

மழை

2010-11-13T12:24:00.000+05:30

இடைவிடாமல்

பொழியும்

உன் நினைவு மழையில்

தாகம் மட்டும்

தீர்ந்தபாடில்லை

விதைகள்

2010-11-13T12:23:00.002+05:30

விதைத்தவன் உறங்கினாலும்

விதைகள் உறங்குவதில்லை

நேசத்தை விதைத்தாய்

நொடிதோறும் விருட்சமாகிறேன்..

கால்கள்

2010-11-13T12:22:00.003+05:30

காலாற நடந்து செல்கையில்

கைகளைப் பற்றி கொண்டோம்..

கால்கள் நடப்பதை விட்டு

பறந்து செல்கிறது..

தற்கொலை

2010-11-13T12:22:00.000+05:30

காலத்தை வீணாக்குவது

தற்கொலைக்கு சமம்..

காதலை வீணாக்குவது

கொலைக்கு நிகர்..

குறுஞ்செய்தி

2010-11-13T12:21:00.000+05:30

பண்டிகைக் கால நாட்களை எண்ணி

விரைவாகவும்,

நிறைவாகவும்

வேலை செய்யும் தொழிலாளியின்

மனநிலைதான் எனக்கும்..

நீ சந்திக்க வருகிறாய் என்று குறுஞ்செய்தி

அனுப்பியதில் இருந்து,..

பெருந்தாகமும் ... போர்க்கோபமும்

2010-09-28T19:18:00.002+05:30

கையேந்தி நிற்குமென் நேசத்திற்கு

எரிச்சலை தருமுனக்கு

இப்போது தெரியாது..

அந்த கைகளுக்குப் பின்னாலிருக்கும்

பெருந்தாகமும் ...

போர்க்கோபமும்

மகிழ்வு

2010-09-28T19:12:00.002+05:30

மிகுந்த துக்கத்திலிருக்கையில்

தூங்கிவிடுவது வழக்கம்..

இப்போது தாக்கும்

இந்த துக்கத்திலிருந்து மீளவும்

தூங்கப் போகிறேன்..

இனி எப்போதும் எனை

துக்கம் தாக்க முடியாதெனும்

மகிழ்வுடன்..

உன் பிம்பம்.

2010-09-28T18:57:00.000+05:30

நீ காயப்படுத்திய

இதயத்தை

நீயே சுமந்து சென்று விடு..

அதிலிருந்து வழியும்

இரத்தக் கறைகளில்

நிழலாடுகிறது..

உன் பிம்பம்..

பெயரற்ற பறவை

2010-09-28T18:02:00.000+05:30

பருவ மழையற்ற ஒரு தருணத்தில்

அந்த விதையை என் நிலத்தில்

விட்டுச் சென்றது

பெயரற்ற பறவையொன்று..

பருவமழை தப்பி பெய்த

மறுநாள் மழையில்

விதை வேர்பிடித்து..

பதினைந்தாம் நாள் திரும்பிய பறவைக்கு

ஆச்சர்யம் கொடுத்தது..

நாளாக ஆக விருட்சமாவதை

கண்கூடாகக் கண்ட பறவை

அதன் வசீகரத்தையும்

அதன் கனிகளையும்

பாராட்டியபடி இருந்தது..

பின்னொருநாள்

சோர்வுடன் திரும்பிய பறவை

அந்த மரத்தை விட்டுப் போவதாக சொல்ல

நிலம் கதறியழுதது..

எதையும் பொருட்படுத்தாத

பெயரற்ற அந்த பறவை

அதற்குப் பின் பகல்வேளைகளில்

வருவதில்லை..

இலைகள் சிறிது சிறிதாக

உதிரத் துவங்கின..

மரம் பட்டுப் போக துவங்கியது..

இன்னும் ஒரே ஒரு இலை மிச்சமிருக்கிறது ..

அந்த பறவையின் வருகைக்காக காற்றிலசைந்தபடி..

மழைத்துளி...

2010-09-28T16:17:00.002+05:30

பெருமழை பெய்த

இரவொன்றில்

ஊடலிலிருந்த நமக்கிடையில்

விழுந்த மழைத் துளிகளை ஒன்றாக்கி

ஒற்றைவிரலால்

கோடு கிழித்து நதியாக்கி

உன் பக்கம் திருப்பினேன்..

அந்த நதியில்

நீந்தி வந்தென் கரை சேர்ந்தாய்..

வெளியே மழை சற்றே குறைந்திருந்தது..

ஒரு தொடக்கமும், ஒரு முடிவும்..

2010-09-28T16:06:00.000+05:30

எப்போது வேண்டுமானாலும்

நிகழ்ந்துவிடக்கூடிய

தொடக்கமொன்றும்

முடிவொன்றும்

இருவருக்குமிடையில்

மௌனித்திருக்கிறது..

உன் பிடிவாதத்தைத்

தூக்கிஎறிந்து ஒரு தொடக்கத்தையோ

என் பிடிவாதத்தை

தொடர்ந்து ஒரு முடிவையோ

எட்டிவிடக் கூடிய காலம்

வெகுதொலைவில் இல்லை..

எப்போது வேண்டுமானாலும்

நிகழ்ந்துவிடும்

ஒரு தொடக்கமும், ஒரு முடிவும்..

ஊசி

2010-09-28T14:43:00.002+05:30

மௌன வாளால்

வெட்டி சாய்ப்பதைவிடவும்

வலிக்கிறது..

உன் வார்த்தை ஊசிகள்

வலி

2010-09-28T14:25:00.002+05:30

வலியிலிருந்து

தப்பித்து செல்ல

ஓடி ஒளிகிறேன் இரவுக்குள்..

இரவில் கரைந்திருக்குமுன் குரல்

என் வலியினை

சிறிது சிறிதாய் உண்ண

வலியிருந்த இடங்களில்

முந்தைய வலிகள் மறைந்து

புதிய வலி பிறந்தது..

சக்கர வியூகம்

2010-09-28T14:19:00.000+05:30

எந்த வித ஆயத்தமும் இல்லாமல்

அந்த போர் மூண்டது..

உன் வார்த்தைகள்

சக்கரங்களாய் சுற்றி சுழன்றன..

நீ வகுக்கிற வியூகங்களை

ஒவ்வொன்றாய் தகர்த்து நிமிர்ந்தேன்..

சுற்றிய சக்கர வியூகத்தில்

மீளமுடியாமல் தவிக்கிறதென் நேசம்..

இனிவரும் நாட்களும்

2010-09-28T11:40:00.000+05:30

எனது

கடந்த சில நாட்கள்

அழகுற நகர்கின்றன..

இனிவரும் நாட்களும்

அவ்வாறே அமையுமெனும்

ஆழ்மன நினைப்பினூடே..

ஓடிவந்து மடியில் புரளும்

செல்லப் பிராணிகளை விரட்டாமல்

அரவணைத்து

பூட்டப்பட்டிருக்கும் எதிர்வீட்டுச்

செடிகளுக்கு நன்னீர் ஊற்றி

பயணத்தில் எதிர்ப்படும்

குழந்தைக்கு ஈரமுத்தம் கொடுத்து

சிக்னல்களில்

எரிச்சல்படாமல் நிதானிப்பது

புரியாமல் திட்டுவோர்க்கு

புன்னகையளிப்பதென

கடந்த சில நாட்கள்

அழகுற நகர்கின்றன..

நெடுந்தவத்தில் கைவரப்பெற்ற

நீ எனக்குள்ளிருக்கையில்

அழகுறவே அமையும்

இனிவரும் நாட்களும்.

சுழன்றாடிய சொற்கள்

2010-09-28T11:38:00.000+05:30

தனித்து வாழத் தெரியாதயென்

சொற்களைத்

தொலைத்து விட்டேன்..

ஒரு மாலைப் பொழுதில்

ஒரு உணவக விடுதியிலிருந்து

வெளியேறிய போது..

சில நாட்கள்

தேடித் திரிந்தும்

கிடைத்தபாடில்லை..

பிறகு தேடுவதை

நிறுத்தி விட்டிருந்தேன்..

மீண்டும் ஒருநாள்

அதே உணவகத்தில்

ஒரு பாதி அலங்கரித்தும்

மறுபாதி சிதிலமடைந்தும்

சுழன்றாடிய சொற்கள்

அவனுக்கு அடிமையாயிருந்தன..

மீட்டெடுக்காமல்

விடைபெற்றேன்.

அடிமைப் பட்டுக் கிடக்குமென்

சொற்கள்

அவனை

ஆட்சிசெய்யக்கூடுமெனும்

அசைக்க முடியாத நம்பிக்கையுடன்..

எழுது

2010-09-28T11:36:00.000+05:30

கசப்புமிகுந்த

கடந்தகாலத்தினை

வெட்டியெறிய

கத்தரிக்கோலும்..

சில வெறுப்புமிக்க

நினைவுகளை

அழித்தெடுக்க

அழிப்பானொன்றும்

வேண்டி நிற்கிறேன்..

இனி

விருப்பமிக்க

வாழ்வையெழுத

எழுதுகோலொன்றும்.

‘வெண்ணிற இரவு’

2010-09-28T11:34:00.000+05:30

‘வெண்ணிற இரவு’ பற்றி

நள்ளிரவில்

பேச்சைத் துவக்கி

அதிகாலை வரை நீட்டித்தாய்..

மாறிப்போயிருந்தது

அடுத்தடுத்த

என் இரவுகள்

வெள்ளையாக.

ப்ரியமானவனே

2010-09-28T11:32:00.002+05:30

எப்போதும் உன் மீது

ப்ரியங்களைப்

பொழியக் காத்திருக்குமென்

மேகத்தை

கலைப்பதற்காக வீசுகிறாய்..

உன் வார்த்தைகளைக் காற்றாய்..

கேள் ப்ரியமானவனே

காற்று கலைக்கும்

வேலையை மட்டும் செய்வதில்லை

பொழியத் தூண்டுவதும் அதுவே.

அலைபேசி

2010-09-16T14:26:00.001+05:30

இறந்து கிடக்கிறது

என் அலைபேசி

உன் அழைப்புக்களின்றி..

உயிர்ப்பி

ஒரு துண்டித்த அழைப்பிலாவது

புன்னகை

2010-09-15T20:27:00.001+05:30

கதறியழும் என்னை

அடித்தாவது

அழுகை நிறுத்த

முயற்சிக்கிறாய்

நீ அடிக்க அடிக்க

அழுகிறேன்..

நான் அழ அழ

நீ அடிக்கிறாய்..

கண்ணீரை துடைத்துவிடேன்,,

புன்னகைக்கிறேன்.

பழி

2010-09-15T20:26:00.000+05:30

நசுக்கப்பட்ட

உணர்வுகள்

வெடித்து சிதறுகையில்

பழி வாங்கி விடத்தான்

தோன்றுகிறது

சில விஷயங்களில்..

பொறுக்கமாட்டாமல்.

உன் நினைவு

2010-09-15T20:23:00.001+05:30

உன்னைப்போல்

அவ்வளவு எளிதாக..

தற்காத்து

தடுக்க முடிவதில்லை..

உருண்டோடிக் கொண்டிருக்கும்

உன் நினைவுகளை..

நீ தரும் வலி

2010-09-15T20:22:00.001+05:30

மிக பாதுக்காப்பாய்

வைத்திருக்கிறேன்

நீ தரும் வலிகளை ..

எந்த வித மருந்தும் தடவாமல்..

வலிகள் பழகிய

எனக்கு மட்டுமே

கையாளத் தெரியும்..

யாராலும் தாங்கி கொள்ள

முடியாத அவற்றின்

கதறலை..

உன் கண்கள்

2010-09-15T13:54:00.005+05:30

பரிச்சயமான வீட்டின்

அனைத்து

அறைகளுக்கும்

சென்று திரும்பும் இருளில்

கைகளே கண்ணாகிறது..

பரிச்சயமற்ற

என் உள்ளத்தின்

அறைகளைத்

தொட்டுச் செல்லும்

உன் கண்கள் கைகளாகிறது..